ഒരാൾക്ക് കൊവിഡ്; ന്യൂസിലാൻഡിൽ സമ്പൂർണ ലോക്ഡൗൺ

ന്യൂസിലാൻഡ്: ആറ് മാസത്തിനിടെ ആദ്യമായി കൊവിഡ് കേസ് റിപ്പോർട്ട് ചെയ്തതിന് പിന്നാലെ ന്യൂസിലാൻഡിൽ പ്രധാനമന്ത്രി ജസിന്ത ആർഡേൺ സമ്പൂർണ ലോക്ഡൗൺ പ്രഖ്യാപിച്ചു. രാജ്യത്തെ ഏറ്റവും വലിയ നഗരമായ ഓക്ക്‌ലാൻഡിൽ 58 കാരനാണ് കൊവിഡ് സ്ഥിരീകരിച്ചത്. ഇതോടെ ചെവ്വാഴ്ച അർധരാത്രി മുതൽ മൂന്ന് ദിവസത്തേക്ക് രാജ്യത്ത് സമ്പൂർണ ലോക്ഡൗൺ പ്രഖ്യാപിച്ചു. കൊവിഡ് സ്ഥിരീകരിച്ച ഓക്‌ലൻഡിൽ ഏഴ് ദിവസം ലോക്ഡൗൺ ആയിരിക്കുമെന്നും ജനങ്ങൾ പൂർണമായും വീടിനകത്ത് കഴിയണമെന്നും പ്രധാനമന്ത്രി ജസിന്ത അഭ്യർഥിച്ചു. 2021 ഫെബ്രുവരിയിലാണ് ന്യൂസിലാൻഡിൽ അവസാനമായി കൊവിഡ് സ്ഥിരീകരിച്ചത്. കൊവിഡ് സ്ഥിരീകരിച്ച മധ്യവയസ്കൻ വാക്സിൻ എടുത്തിരുന്നില്ലെന്നാണ് റിപ്പോർട്ട്. ലോക രാജ്യങ്ങളിൽ കൊവിഡ് പിടിമുറുക്കിയപ്പോൾ ന്യൂസിലാൻഡിലെ പ്രതിരോധ പ്രവർത്തനങ്ങൾ വലിയ ശ്രദ്ധപിടിച്ച് പറ്റിയിരുന്നു. 2,500 പേർക്ക് മാത്രമാണ് രാജ്യത്ത് ഇതുവരെ കൊവിഡ് സ്ഥിരീകരിച്ചത്. 26 പേരാണ് കൊവിഡ് ബാധിച്ച് മരിച്ചത്.